Од LEGO објавија дека со своите производи ќе почнат да нудат аудио упатства, како и упатства со брајова азбука, наменети за децата кои се слепи или со оштетен вид.
Овој проект е резултат на партнерството помеѓу LEGO и австрискиот истражувачки институт за вештачка интелигенција, а се работи за специјално дизајниран софтвер кој може да ги преведува упатствата за градење на овие познати играчки.
Иницијативата е креирана од Метју Шифри, 22 годишен слеп претприемач, кој започнал со креирање на упатства базирани на јазик со неговиот пријател Лилја за деца како него, уште на 13 годишна возраст. По лансирање на сопствен вебсајт со упатства, тој добивал рани побарувања од многу родители и деца, а по смртта на Лилја во 2017-та Метју им пристапил на LEGO со неговата идеја.
Софтверот кој бил креиран од институтот е вештачка интелигенција која ги преведува податоците (дизајнерска скрипта која ја користат дизајнерите од LEGO) од визуелни во текстуални упатства, а истите ќе бидат на располагање на англиски јазик, бесплатно, на сајтот на LEGO.
Долгорочните планови се да се додаваат што повеќе јазици за идните продукти.