Членови на Конгресот на САД, ги обвинија директорите на „Амазон“ дека ја довеле во заблуда, или лажеле државната антимонополска комисија за своите деловни дејности, по неодамнешните наводи дека компанијата користи податоци од продавачи од трети страни за да копира производи и ги промовира тие верзии во резултатите од пребарувањето.
Претставници на Комитетот за недоверба при Претставничкиот дом, ја разгледуваат можноста Министерството за правда да отпочне кривична истрага. Во писмото до главниот извршен директор Енди Џеси, се бара од Амазон да обезбеди „ослободителни докази“ во поткрепа на сведочењето на извршните директори (вклучително и поранешниот извршен директор Џеф Безос) од 2019 и 2020 година, според „Волстрит журнал“.
Истрага објавена минатата недела посочува дека „Амазон Индија“ „водела системска кампања“ за копирање производи на други компании и манипулација со резултатите од пребарувањето на интернет за да ги промовира.
„Силно ве охрабруваме да ја искористите оваа можност за да го поправите записот и да му дадете на Комитетот, под заклетва, вистинити и точни одговори на ова барање, додека размислуваме дали упатувањето до Министерството за правда за кривична истрага е соодветно“, напишаа пратениците во писмото.
– „Во најдобар случај, овој извештај потврдува дека претставниците на ’Амазон‘ го довеле Комитетот во заблуда. Во најлош случај, тоа покажува дека можеби го излажале Конгресот, што значи прекршување на федералниот кривичен закон”.
Гласноговорник на „Амазон“ ги негира наводите.
– „Амазон“ и неговите директори не го доведоа во заблуда Комитетот, а ние го негиравме тоа и побаравме да го поправиме записот за неточните медиумски написи за кои стана збор. Како што претходно рековме, имаме внатрешна политика, којашто ја надминува политиката на која било друга малопродажба за која знаеме, што забранува употреба на индивидуални податоци од продавачот за развој на производи со приватна етикета на „Амазон“. Ги испитуваме сите наводи дека оваа политика е прекршена и преземаме соодветни мерки. Покрај тоа, ние го обликуваме нашето пребарување за да ги прикажеме предметите што клиентите ќе сакаат да ги купат, без оглед дали се понудени од Амазон или некој од нашите партнери за продажба, објасни претставникот на „Амазон“.