Сигурно многу пати до сега ви се случило на улица да здогледате девојка во прекрасен фустан или одлични чизми и да посакате тоа модно парче веднаш да се најде во вашиот ормар, но некако ви било непријатно да ја застанете и да ја прашате од каде го купила.
Сега тоа повеќе нема да биде проблем бидејќи создадена е апликација која за миг ќе ви открие каде можете да ја најдете облеката која ја посакувате.
Новата апликација, која функционира на многу сличен начин како познатата Shazam, музичка апликација која ја идентификува песната на основа на краткотраен звучен запис, има за цел да ви овозможи за момент да пронајдете каде може да ги купите модните парчиња кои ви се допаѓаат на случајните поминувачи, пишува Daily Mail.
Апликацијата, наречена ASAP54, користи визуелна технологија за препознавање, па со помош на друштвените мрежи веднаш ќе ви открие што точно барате. Сè што треба да направите е да го фотографирате тоа парче, ткаенина или слика во списание, а потоа апликацијата ќе ја скенира фотографијата и тој предмет ќе го бара во сопствената база на податоци.
Доколку не успеете да го пронајдете баш она што сте го виделе, апликацијата ќе би понуди низа слични производи и директни линкови за нивно купување. Исто така, ASAP54 има база на стилисти при рака, кои ветуваат дека во рок од 24 часа преку e-mail ќе ви испратат пет најслични предмети.
Бесплатната апликација е создадена пред една година од страна на една лондонска компанија која е во сопственост на Daniele Cecilio, а идејата настанала заради фрустрации кои се раѓаат за време на пребарувањето на облека.