Интернационалниот хакатон „НАСА Спејс Апс Челинџ Македонија 2014“ (NASA Space Apps Challenge Macedonia 2014) настанот кој утре и задутре (12 и 13 април) ќе се одржи во Скопје, денес свечено беше прогласен за отворен.
Во Македонија овој настан се организира по втор пат и како коорганизатори за прв пат се вклучени вкупно четиринаесет студентски организации, како СП ФИНКИ, СП ФЕИТ, СП МФС, IAESTE, EESTEC, СП УКМ, BEST Скопје, СП УКЛО, два Студентски Парламенти на Државниот Универзитет-Тетово, ИЛУМИНЕ, ESTIEM, DECA, Скопско Астрономско Друштво. Целата техничка поддршка потребна за овој дводневен настан, годинава е обезбеден од страна на Македонски Телеком која подразбира Optic Giga услуга со брзина од 1Gbps како и Wi-Fi интернет пристап на сите три спрата на локацијата на одржување на настанот.
-Навистина е значајно решенијата кои ќе се направат тука да добијат можност да се направат на едно повисоко ниво и навистина ќе биде успех ако тим од Македонија се пласира на глобално ниво , изјави Ирена Чаушевска, лидерката на НАСА Спејс Апс Челинџ Македонија 2014.
Настанот поттикнува иновативно решавање на проблеми преку масовна колаборација со цел креирање на open-source решенија за глобални предизвици.
Оваа година членовите на тимовите го направија својот избор од над 50 предизвици на следните 5 теми: технологијата во вселената, летови на човекот во вселената, астероиди, набљудување на Земјата и роботика. Во 2013 година, на настанот учествуваа вкупно 9147 учесници, а беше одржан во 83 градови, 44 држави и беа направени вкупно 770 апликации.
Оваа година истиот ќе се реализира во 100 градови низ целиот свет, а во Македонија беа пријавени 300 учесници, од кои 150 беа избрани да бидат дел од овој интернационален настан и да го изнесат своето решение на светско ниво.