Постојат повеќе начини да го продолжите, но и да го скратите животниот век на батеријата. Сепак, некои совети поврзани со полнењето се мит, а некои пак се вистина.
На пример, долго време се верува дека полначите на помалку познатите производители ги уништуваат батериите, што апсолутно е неточно. Проблемот е во копиите кои во себе имаат грешка, но сите полначи кои легално ги купувате не делуваат негативно на батеријата.
Во продолжение ви презентираме неколку митови (и вистини).
Не е добро да се користи телефонот додека е на полнач. Ова не е точно, телефонот може да се користи колку сакате, се додека не користите сомнителен полнач. Единствена последица е што полнењето ќе трае малку подолго.
Полнењето во текот на цела ноќ ја уништува батеријата. Повеќето паметни телефони всушност препознаваат кога батеријата им е полна и го прекинуваат понатамошното полнење. Сепак не е добро телефонот да биде приклучен на полнач во текот на целата ноќ и тоа постојано. Батеријата подолго ќе трае доколку го држите телефонот помеѓу 40 и 80% од капацитетот.
Паметните телефони никогаш не треба да ги исклучувате. Во прашање е уред, но и на него му е потребна пауза од време на време. Ако не морате секогаш да бидете достапни, повремено исклучете го телефонот. Се препорачува тоа да го направите во текот на една ноќ неделно.
Немојте да го полните телефонот се додека батеријата во целост не се истроши. Подобро батеријата да ја дополнувате секојдневно, отколку секој пат да стартувате од нула. Литиум јонските батерии кои ги имаат повеќето современи телефони подобро се држат кога се наполнети. Ако постојано ги цедите до последна црта, можат да станат нестабилни.
Топлината ќе ја уништи батеријата. Тоа е точно. Батериите не трпат високи температури, а литиум јонските батерии веќе се доволно загреани од полнењето и самото работење. Но исто така не им одговара ни ладно време, бидејќи во тие услови побрзо се празнат.