Откако на иницијатива на институтот за вештачка интелигенција од германскиот Универзитет во Бремен, пред неколку години е стартуван проектот RoboEarth, многу тимови ширум светот ја користат таа платформа на отворен код за сопствени креации.
Идејата е на роботите да им се овозможи интелигенција преку интернет, односно да им го прилагоди интернетот за да можат да разбираат и да учат од него.
Помеѓу останатите, тука е и четиригодишниот европски истражувачки проект под називот Robohow кој започна во 2012 година. Идејата на неговите креатори е да им се овозможи на роботите сериозно да им конкурираат на луѓето во изведување на разни секојдневни манипулациски активности и тоа во човековото деловно и животно опкружување.
Крајната визија на научниците од Германија, Белгија, Франција, Швајцарија, Грција и Холандија кои соработуваат на овој проект, е да произведат роботи кои ќе бидат во состојба да ги разбираат инструкциите на луѓето во извршување на разни задачи, слично како што луѓето усвојуваат некои знаења и вештини преку интернет.
На пример, еден ден на својот домашен робот готвач ќе му речете “зготви ми нешто ново“, по што тој на интернет ќе ја пребара базата на рецепти и јадења и ќе ви предложи некое јадење кое се темели на вашиот вкус и на намирниците кои ги поседувате дома.
Кога ќе се сложите со неговиот избор или пак ќе дадете команда да зготви нешто сосема различно со што нема искуство, тој на интернет ќе побара видео од училиштето “голи готвачи“, ќе ја извежба техниката и подготовката за одреденото јадење.
Ако сумираме, програмирањето на вештачката интелигенција на Robohow се темели на знаење и пренесување на искуство, а визијата на научниците се когнитивни роботи кои автономно изведуваат комплексни секојдневни манипулации и ги прошируваат своите вештини со гледање на луѓето и учење од нив.