Од Twitter соопштија дека започнаа да ги тестираат новите опции кои на корисниците ќе им овозможат купување на производи со едноставно твитање.
- Започнуваме со тестирање на новиот начин преку кој ќе можете да откриете и купите производи преку Twitter. За мал процент на корисници на САД, кој со време ќе расте, поединечни твитови на нашите партнери ќе ја имаат опцијата купи (buy), која ќе им овозможи купување директно преку твит, се вели во соопштението кое е објавено на официјалниот блог на компанијата.
Во сооптението се вели дека ова е почетен чекор во процесот кој Twitter како социјална мрежа би требало да го отвори кон полето на интернет купувањето. Освен секојдневните понуди кои им се достапни на корисниците и на останатите „традиционални“ начини на купување, на твитерашите ќе им бидат понудени и посебни поволности и акциски попусти.
Откако корисникот на Twitter ќе ја кликне опцијата за купување, ќе добие повеќе детали за производот и начинот на плаќање. Кога потребните податоци ќе се внесат, тие се испраќаат на компанијата која ги нуди производите и кои потоа ги испраќаат купените артикли на саканата адреса.
Од Twitter тврдат дека сите податоци, а особено оние за сметките и приватните информации за корисникот, ќе бидат строго чувани, а ако корисникот сака ќе може да ја укине оваа опција од својот профил.