Триесет и едногодишен американски војник ги користел Google Glass и до 18 часа на ден, а кога не ги носел на себе станувал нервозен.
Исто така му се појавил и тик во раката кога таа му одела кон слепоочницата, како потег со кој се управува со очилата. Тој се пријавил во центар за лечење на зависност, а лекарите велат дека ова е првиот познат случај на „зависност од интернет“ кој го предизвикува овој гаџет на Google.
На лекарите им рекол дека во текот на два месеци, кога ги имал очилата, почнал да има соништа како да гледа преку малиот екран на очилата.
- Луѓето верувале дека алкохолизмот не е проблем, ги обвинувале луѓето или нивната околина. Ќе биде потребно време за да прифатиме дека и зависноста од интернетот е реална, вели Андре Доан, кој го објави трудот за овој пациент.
Тој додава дека има доволно докази за зависноста од интернет, а дека само прашање на време е истражувањето и лечењето да „фатат чекор“, пишува Гардијан.
Војникот поминал 35 дена во програма за лечење од зависност на алкохол, во кој пациентите се држат што подалеку од алкохол, дрога, цигари или гаџети.
По третманот војникот рекол да се чувствува подобро, и е вклучен во програма од 12 чекори.