Последните неколку години бевме сведоци на повеќе обиди за гасење на најпознатата и легендарна торент страница, Pirate Bay, која користи сајтови од најразлични локации како Карибите со цел да продолжи со работа.
Оваа недела окружниот суд во Стокхолм, Шведска одлучи да ги одземе двата „.se“ домејни од Pirate Bay и да ги отстапи на властите. Се работи за домејните thepiratebay.se и piratebay.se.
- Ова е еден од многуте обиди на властите да се справат со оваа популарна страна за споделување на торент фајлови, најчесто со содржина која што не е наменета бесплатно да биде споделувана меѓу корисниците, пишува CNet.
Меѓутоа ова ни приближно не значи крај на The Pirate Bay, односно овој потег само може да го отежне функционирањето на ваквите страни во Шведска. Доколку се обидете да ја отворите страната на TPB, ќе бидете пренасочени на некој од другите 5 домејни на кои што функционира истата, односно на еден од thepiratebay.mn, .gd, .ls, .am и .gs.
Поради ова сменето е и логото на главната страна на кое што е додадена хидра со 5 глави на кој што се прикажани сите домејни. Со ова се испраќа позната порака, дека кога властите ќе „исечат“ една глава, повеќе други веднаш „раснат“.