Мартин Стефановски (24) е дипломиран економист кому му недостасува уште еден испит за да стане магистер по економски науки. Воедно, тој е најбрз и единствен македонски пливач кој држи два национални рекорда во две држави: во Македонија, 50м. краул (24.33) и во Србија, како дел од тимот на Академија Милорад Чавиќ, штафета 4x50м. мешано (1:47.19).
Омилени дисциплини му се краул и делфин. Покрај настапот на претстојното Европско првенство во Берлин, амбиција му е да ја претставува Македонија на Летните олимписки игри во Рио де Жанеиро во 2016 година.
Кои карактерни особини те прават горд Македонец?
- Борбеност и оптимизам. Борбеност, затоа што ние сме борбен народ кој не се предава и не се откажува така лесно. Оптимизам, затоа што ние Македонците веруваме и сме оптимисти и кога е нешто невозможно. Затоа сме и посебни!
Кога си во странство, како ја претставуваш и што најчесто те прашуваат за Македонија?
- Македонија ја претставувам како земја каде што се раѓаат шампиони. Секогаш ја претставувам во најдобро светло. Доказ за тоа се моите победи. Кога некаде патувам, луѓето најчесто се интересираат за традициите, храната и луѓето што живеат кај нас.
Кои македонски спортисти посебно ги почитуваш?
- Секогаш ми било тешко да одговорам на вакво прашање. Има многу добри спортисти во нашата држава, од кои поголем дел за жал или за среќа тренираат надвор. Сите нив подеднакво ги почитувам. Во оваа прилика можам да ги издвојам: Кире Лазаров, Атанас Николовски, Димче Грабул, Томи Стефановски од постарата генерација и Томи Јотовски, Манасков од помладата генерација.
Омилени места во родното Скопје?
- На прво место ми е центарот на Скопје, посебно ваков каков што е сега, реконструиран. Ги сакам и кафе „Скопје”-срцето на градот и Градскиот парк кој е комбинација, преку ден за прошетка и навечер за ноќен живот.
Што најчесто јадеш од македонската кујна и дали сам готвиш?
- Поради тоа што веќе три години живеам сам, принуден сум и сам да готвам. Освен тоа, сам перам и пеглам, хаха. Најчесто готвам паста, затоа што нашите специјалитети бараат повеќе време за подготвување. Избегнувам брза храна, иако некогаш, признавам, си дозволувам да се почестам.