Ламбе Алабаковски со „Чекам јас”, Тамара Тодевска со „Тешко без тебе” и Димитар Андоновски со „Ако ме боли” се закитија со првата (20.000 евра), втората (10.000 евра) и третата (5.000 евра) награда на годинашново издание на Скопскиот фестивал. Најголем впечаток остави сценографијата, сценските ефекти и оркестарот составен од 54 музичари.
Комплетната изведба на песните во живо даде посебен шмек и потсети на вистинската вредност на музиката: да се изведува комплетно во живо. Квалитетот на песните е индивидуална категорија, но очигледно е дека доминираа балади кои на крајот и ги однесоа наградите.
Посебно внимание предизвика и настапот и интерпретацијата на Нина Јанева, Андријана Јаневска и гостинот од Хрватска Горан Каран. Награда за животно дело му беше доделена на композиторот Љубомир Бранџолица за неговиот опус и ангажман во забавната и сериозна музика.