Сигурно од време на време ви се случува да ви „заигра“ очниот капак, без никаква причина. Тоа е многу честа појава која обично го зафаќа само едното око едновремено. Во медицината, ова треперење на долниот или горниот очен капак се нарекува миокимија.
Се смета дека конкретната причина за ваквите контракции на очниот капак произлегуваат од функционирањето на одредени нервни зони, а на истите можат да влијаат некои секојдневни појави, како што се стресот, заморот, недостатокот на сон, претераниот внес на кофеин, долготрајното седење пред компјутерот, пореметување на нервите, но и недостатокот на магнезиум во организмот, кој се губи преку потењето за време на напорен тренинг.
Но, за оваа појава се врзуваат бројни митови и суеверија, кои се разликуваат во различни култури. Така, на нашето поднебје, играњето на капакот на левото око се толкува дека претстои нешто лошо, додека во Кина истото се смета за добра среќа.
Еве како се толкува миокимијата во различни делови од светот:
Кина
Играњето на десното око се смета за лош предзнак, додека играњето на левото е знак на добра среќа. Но, кај жените ситуацијата е обратна. Кога на жената и трепери долниот лев капак, се верува дека ќе плаче или дека некој ја озборува.
Делови на Африка
Во некои делови на Африка, се верува дека кога горниот очен капак трепери, тоа е знак за сретнување со некој кој не сте го очекувале, а подрипнувањето на долниот капак значи дека наскоро ќе плачете.
Индија
Во Индија се толкува обратно отколку во Кина. Играњето на десното око е знак за добри вести, а левото за лоша среќа.
Хаваи
Треперењето на левото око за Хавајците е знак за налетување на странец, а константното подрипнување на истото око значи пропаст во семејството.