Го извадивте вашиот омилен волнен џемпер од плакарот, а со него излетаа и молци! Тоа е првиот знак дека во плакарот се кријат мали гладни суштества, кои се виновни за дупките на нашата облека. Во прилог ви прикажуваме неколку совети преку кои ќе можете да го спречете нивното размножување:
Молците сакаат нечисти ткаенини, па затоа пред да ја кренете гардеробата исперете ја или однесете ја на хемиско чистење. Често ни се случува на пример некое сако кое сме го носеле два-три пати да ни изгледа чисто, а всушност мора да се освежи, бидејќи нечистотијата, прашината и потта ги привлекуваат молците.
Редовно и темелно чистете го просторот околу плакарот и самиот плакар. Молците ги обожаваат дупките, сакаат да се пикаат под мебелот, а особено ги сакаат теписите и завесите. Ако за време на чистењето забележите молци во просторот, по чистењето веднаш исфрлете ги крпите, но и кесето од правосмукалката.
Облеката од волна, свила, крзно и онаа направена од други животински влакна чувајте ја во посебни вреќи кои не пропуштаат воздух. Евентуалните отвори на вреќите затворете ги со леплива лента.
Екстремните промени на температури може да ги уништат молците. Алиштата нападнати од молци, ставете ги во пластични вреќи и нека постојат два дена во ладилник, а потоа поветрејте ги и оставете ги во потопла просторија. Исперете ги и на тој начин ќе се ослободите од молците.
Во плакарот ставете природни хемикалии кои ќе ги избркаат овие ситни суштества. Кедарот има силен мирис, а една од најпопуларните билки за борба против молците е и лавандата.