Во учебниците по историјата нема да сретнете ништо за епската и ужасна војна во гетото Сан Ли Тин од 1972 до 1975 година. Па, што ако било тоа детска војна?! Сакале да признаеме или не, понекогаш и децата знаат да бидат подли и свирепи. Единствената разлика е во тоа што оваа војна треба да трае. И кога ќе го снема непријателот, треба да се најде нов, макар да се измисли. А мала ли е причината Непалците да бидат непријатели, оти па кои се тие да немаат правоаголно знаме!? „Војната“ е живот за децата од Сан Ли Тин и таа на чудесен начин го отсликува животот на возрасните.
Ова е приказна за двојниот егзил: егзил во однос на првобитните земји на децата и егзил во однос на Кина, која ги опкружува, но од која се отсечени во својство на крајно непожелни гости.
Нараторката е ќерка на белгиски дипломат, родена во Јапонија, која три години живее во Кина. А колку само пленува едно „доаѓам од Кина“ кажано со рамнодушен поглед. За време на „војната“, таа има неверојатни шест години и велосипед што во нејзиниот живот зазел една таква митолошка димензија што достигнал статус на коњ.
И оваа војна, како и Тројанската, има една своја убава Елена. Војната овде не започнува поради неа, ама Амели (нараторката никаде не го пишува своето име, но таа кажува дека сè во оваа приказна е вистина и дека ниту едно име не е променето) продолжува да се бори, за неа и за нејзиното внимание. Љубов за време на војна. Колку една детска љубов, која преминува во опсесија, се разликува од љубовта кај возрасните?
Толку сакав да ѝ студи бидејќи ќе треба некој да ја топли.
Малечка шармантна книга, евокација на едно детство, комбинација од детски емоции и интелектуална перспектива. Книга за сите себесаботажи, во име на љубовта, на пример. Амели Нотомб ќе ве освои и ќе ја проголтате за неколку часа.
ИДИВИДИ во соработка со издавачката куќа „
Антолог“ ќе доделат примерок од романот „Љубовна саботажа“ од Амели Нотомб на еден од вас по случаен избор. Сè што треба да направите е во коментар на
овој линк, кој е споделен на нашиот официјален Facebook профил, да го тагнете оној кому би му ја подариле оваа книга доколку ја освоите, а воедно и јавно да ја споделите оваа вест.