Секое дете заслужува да живее во мир и благосостојба. Токму затоа видеото на малиот Омран од Сирија предизвика мошне силни емоции кога за прв го обиколи светот.
Малото момче кое седи во амбулантско возило, прекриено со прав и крв, за кратко стана вирална приказна која што беше споделувана од илјадници луѓе кои апелираа за запирање на војната во Алепо.
Сепак, деновиве низ медиумите кружи нова верзија за тоа што му се случи на малиот Омран.
Видеото и фотографиите од детето тогаш беа искористени за да се илустрира бруталноста на Асад режимот. Но, денес неговото семејство вели дека му е верно токму на истиот тој режим. Таткото на Омран изјави дека бунтовничките групи и интернационалните медиуми сакале да го искористат детето за да го нападнат сирискиот режим.
-Тие сакаа да тргуваат со неговата крв и затоа ги објавија неговите фотографии, вели тој и додава дека му ја избричил главата на детето за да го скрие од медиумите. Инаку десетгодишниот брат на Омран, Али го загуби животот во истиот напад во кој беше повреден Омран.
И додека едни се прашуваат дали детето навистина беше искористено за пропаганда, други тврдат дека семејството е принудено да го подржува режимот за да преживее.
Која и да е вистината, судејќи по фотографиите Омран изгледа добро и здраво и е далеку од онаа ужасна слика која го растревожи светот.