Од 2008-ма до 2011-та, Пентагон тајно потрошил 22 милиони долари на малку позната програма за истражување на неидентификуваните летечки објекти (НЛО) како и потенцијалните закани од нив, а ова е прв пат тие јавно да признаат дека ваква програма воопшто постои.
Напредната програма за идентификација на закани била креирана во 2007-ма, по барање на сенаторот на Невада, Хари Рид.
Иако владиното финансирање за програмата било запрено во 2012-та, таа продолжува да функционира под водство на Луис Елизондо, офицер за воено разузнавање, кој дал оставка од неговата позиција во октомври поради фрустрацијата од недоволното финансирање од страна на Пентагон.
Во зачетокот на програмата, Пентагон исплатил поголем дел од доделените 22 милиони долари на воздухопловна компанија во сопственост на Роберт Бигелоу, милијардер кој бил апсолутно убеден дека вонземјаните постојат.
Тој наводно бил близок пријател на Рид, кој давал пари за негови политички кампањи за реизбор во сенатот во 2004-та и 2010-та.
Ова не е првпат владата на САД да истражува НЛО-а и останати мистериозни воздухопловни феномени.
Според анализи на ЦИА, во 1947-ма американските воздухопловни сили го лансирале „Project Sign” со цел собирање, оценување и дистрибуирање на сите информации во рамките на владата, под претпоставка дека НЛО-ата би можеле да бидат реални и од интерес за националната безбедност.