На Uber Elevate 2018 самитот беа прикажани визии на неколку архитектонски фирми во врска со тоа како тие ја замислуваат иднината на инфраструктурата на летачките таксија, кои вклучуваат т.н „Скајпортови“ (Skyports) односно „пристаништа“ за таксијата.
Еден од концептите доаѓа од архитектонската фирма Corgan во вид на проектот „Connect” (Поврзување). Се работи за вертикален аеродром за до 1000 летачки таксија кои можат да полетуваат и слетуваат вертикално.
Модулите би можеле да се поставуваат на крововите на паркинг гаражи или облакодери, на постоечки автопати и сл. Во суштина, ова би функционирало како сегашните аеродроми, минус пистите, а повеќе модули би можеле да се комбинираат за да креираат т.н „Мега Скајпорт“.
Ваквите концепти се разликуваат од начинот на кој досега се сметаше дека ќе функционираат летечките таксија, а тоа е „извади го смартфонот и викни си такси“, бидејќи наместо таксито да дојде т.е долета до вас, ќе треба да се отиде до некој ваков скајпорт.