Шангајскиот архитект Флориан Маркет го направи проектот „the org”, кој е неговата замисла за изгледот на пазарот за недвижнини од иднината и кој придонесува за балансот и еднаквоста помеѓу идните помлади и постоечките постари генерации.
Овој модуларен систем е лесен за изработување и може да се прилагоди според потребите на оние кои би живееле во објектите од “the org”.
Модулите односно единиците можат да се користат како флексибилни канцеларии, за земјоделство, кујни, спиење, па дури и туширање, а системот им дава на жителите можност да бидат независни и автономни.
Овие модули би можеле да се нарачаат инстантно преку апликација на смартфони и разни други уреди, а поради стандардизацијата и модуларноста, би биле многу лесни за составување. Истите би можеле лесно да се преместуваат и движат, давајќи можност на помладата генерација да живее динамично во некој град и често да го менува местото на живеење. Би доаѓале во разни големини, во зависност од потребите на корисниците, така да во нив би можела да живее само една личност или пак неколку.
Системот е направен од материјали кои 100% можат да се рециклираат, а би можел самиот да се одржува благодарение на неколку технолошки системи вградени во него.