Кинескиот град Ченгду, кој е главен град на провинцијата Сичуан во југозападна Кина и во кој живеат над 14 милиони луѓе, планира да лансира сателит кој ќе функционира како еден вид на „вештачка Месечина“ до 2020-та.
Идејата е светлината од него да биде доволно силна за да ги замени уличните светилки, осветлувајќи област со дијаметар од 10 до 80 километри, а истата би можела да се нагодува во распон од неколку десетици метри.
Плановите за ова биле откриени од директорот на Casc, главниот изведувач на проектите на кинеската вселенска програма.
Иако многу детали поврзани со ова не се познати, тој изјавил дека тестирањата на оваа технологија траат веќе со години.
Новата “Месечина“ би била сателит премачкан со специјален слој кој би ја рефлектирал светлината од Сонцето врз Ченгду во ноќните часови.
Некои се загрижени за потенцијалното негативно влијание кое вакво нешто би имало на дивиот свет и на жителите на градот, бидејќи силната светлина навечер би можела да влијае на циклусите на спиење на луѓето, како и да ги збуни ноќните и дневни животни, менувајќи им го однесувањето.
Други, пак, велат дека светлината од оваа вештачка Месечина само би ја надополнувала онаа на природната, креирајќи ништо повеќе од „мрачен сјај“, каков што е за време на самрак.
Дали ова ќе биде точно останува да видиме, бидејќи новата Месечина според нејзините креатори создавала 8 пати повеќе светлина од вистинската.