Ford измислија паметна количка за купување во супермаркети која користи сензори за превенција од потенцијален удар, како инспирација земајќи ја технологијата за асистенција пред колизија од нивните автомобили, која на возачите им помага да ги избегнат сообраќајните незгоди.
Оваа технологија во автомобилите користи предна камера и радар за детектирање на возила, пешаци и велосипедисти на патот и автоматски ги активира сопирачките доколку возачот не реагира на предупредувањата.
На сличен начин, количката користи сензори кои скенираат луѓе и објекти пред автоматски да ги активираат сопирачките доколку постои потенцијал за судар.
Со ваквата технологија би се спречиле ситуациите кога децата туркаат колички во супермаркет и не пазејќи, буткаат сè пред себе или ги удираат купувачите во нозе, или кога колички оставени на паркингот се придвижуваат и удираат во возилата.
Иако се работи само за прототип кој Ford не планира во скоро време да го реализира, сепак ова е концепт кој би имал корисна примена во реалноста.