За прв пат е забележана албино панда и тоа во Кина, како се движи низ бамбусова шума. Пандата била фотографирана со инфрацрвена камера која се активирала кога пандата се движела во нејзина близина.
Се работи за неверојатно редок примерок, за кој се проценува дека е новороденче старо 1 до 2 години.
Официјалните лица од националниот природен резерват Волонг во кинеската провинција Сичуан ја објавија фотографијата од гигантската панда (Ailuropoda melanoleuca), објаснувајќи дека таа била снимена во средината на април.
Албинизмот е ретка генетска состојба која се јавува и кај луѓето и животните и предизвикува неможност за создавање меланинска пигментација на кожата.
Според резерватот, заштитената област каде пандата била снимена се наоѓа на 2000 метри надморска височина. Сега во тој реон ќе бидат додадени нови камери со цел да се следи движењето на ова животно кое досега никогаш не било документирано.
Моментално се проценува дека во дивините живеат помалку од 1900 панди, од кои само 500 до 1000 се возрасни, поради што постои загриженост од нивно исчезнување.