Професорот по уметност, Сем Ван Акен, успеа да создаде хибрид дрво кое раѓа 40 различни плодови. На секое уникатно „Tree of 40 Fruit“ растат плодови меѓу кои праски, кајсии, сливи, цреши, па дури и бадеми, а самото дрво е добиено по пат на калемење.
Во 2008-ма Акен дознал дека еден познат овоштарник ќе биде затворен поради недостаток на финансии. Пропаѓањето на овоштарникот значело и пропаѓање на повеќе стари сорти на овошја, па сакајќи да ги зачува го купил местото и започнал да експериментира со дрвата.
На располагање имал повеќе од 250 видови на овошје кои најпрвин ги набљудувал кога цветаат, а потоа започнал да ги калеми на едно дрво кое му служело како основа. Му биле потребни пет години за да го постигне она што го сака.
Денес неговото „Tree of 40 Fruit“ раѓа најразлични типови на сливи, праски, кајсии, цреши, па дури и бадеми. Во текот на целата година изгледа како секое друго дрво, а во пролет цвета во најразлични бои како бела, розова, црвена и виолетова.
За сега се одгледани 16 вакви дрва кои се дел од приватни колекции, музеи и општински заедници низ САД.