Електричниот чајник за брзо зовривање на вода е особено корисна и практична направа, без која во последно време не можеме да го замислиме нашето домаќинство. Кога е во прашање неговото користење, постојано се соочуваме со насобирање на здодевниот каменец кој тешко се отстранува.
Во подобро снабдените продавници можете да најдете средства во форма на прашок наменети за чистење на електричниот чајник, но истото можете да го постигнете и со намирница која ја имате во вашата кујна и која не е штетна по здравјето.
Станува збор за оцетот, кој е идеален избор за чистење на сите површини на кои се има нафатено каменецот.
Она што е потребно да го направите е следново:
1. Во електричниот чајник истурете оцет доволно за да го покрие целото метално тло и да има уште еден прст над него. Може да ставите и цела шолја оцет, бидејќи истиот не му штети на дното, ниту пак на пластиката.
2. Оставете да отстои 20-тина минути. За поголеми наслаги од каменец, можете да го оставите и неколку часа.
3. Потоа добро исплакнете го електричниот чајник со вода.
4. Постапката повторувајте ја периодично за чајникот да ве служи што подолго.