Откако „прошетавме“ низ албанското крајбрежје, на ред дојде и уште еден наш сосед, односно Бугарија и плажите на Црното море. Бугарското крајбрежје има прекрасни плажи со бел песок, на кои постојано се одржуваат забави, со што ја прави Бугарија одлична дестинација за помладите.
Сончев брег
Ова е една од најпознатите плажи во Бугарија, а воедно и најживата и најголемата плажа. Сончев брег е долга 8км и се наоѓа веднаш по Несебар. На оваа плажа ќе најдете ресторани, барови, како и ноќни клубови во кои се прават најлудите журки.
Златни песоци
Името на оваа плажа целосно ја опишува, бидејќи плажата е исполнета со песок во златна боја, а многумина веруваат дека токму овде се наоѓа најубавиот песок во цела Европа. На оддалеченост од околу 20км од Варна, Златни песоци нуди интересни ресорти за фамилијарен, но и друштвен одмор. Плажата е опколена со природниот парк „Златни песоци“, кој има густа шума.
Албена
Ова е една од плажите која нуди фамилијарна атмосфера со аква-паркови, мини-голф терени и забавни паркови. Долгата, чиста и песочна плажа се влева во чистата вода, која не е воопшто длабока. Со оглед на длабочината на нивото на водата во овој регион, Албена е погодна доколку имате мали деца.
Ахтопол
Ова е најјужниот град во Бугарија, кој не е многу далеку од турската граница. Во Ахтопол нема да најдете луд ноќен живот, туку рибарски бротчиња, дрвени куќички и светилник,. Името на градот значи „Град на љубовта“, па можеби токму затоа забавта останува во посеверните градови на бугарската ривиера.
Иракли
Оваа плажа е за нудистите, па оние кои обожаваат добар тен, добредојдени се во Иракли. Она што е интересно е што овде се нуди бесплатно кампување на плажата, каде што често ќе гледате лагуни, желки и разни птици, кои живеат во овој крај. Ако сакате интимност тогаш ова е вистинската плажа за вас.