Секој турист кој ја посетува Индија, никако не го прескокнува познатиот Таџ Махал. Мавзолејот е една од најпознатите градби во Индија, кој ја претставува вечната љубов. Изграден е помеѓу 1632 и 1647 од тогашниот владетел Шах Јахан, кој го изградил во чест на неговата омилена жена Мумтаз Махал, која починала за време на пораѓај. Но, покрај овие работи, грабата крие неколку тајни.
Насекаде може да се забележат оптички илузии
Архитектите и уметниците на Таџ Махал биле господари на пропорциите и триковите кои го мамат окото. Кога ќе стигнете до главната порта на градбата, споменикот ќе ви изгледа дека е многу голем и се наоѓа близу. Но, како што ќе се доближувате до него, се стеснува во големина – сосема спротивно од она што сте го очекувале. И додека столбовите ви изгледаат дека се прави, тие всушност се навалени нанапред, за да формираат една естетска рамнотежа. Но, освен за убавина, столбовите и го штитат споменикот од земјотрес.
Најпознатиот мит е погрешен
Според популарна легенда, Шах Јахан очајно сакал мавзолејот да биде дело на кое му нема рамно. За да се осигура дека нема да има исто такво дело, тој им ги отсекол рацете и му ги ископал очите на архитектите и уметниците кои работеле на овој споменик. Сепак, оваа легенда не е поткрепена со никакви докази, па токму затоа сите веруваат дека е погрешна.
И двата кенотафи се празни
Во внатрешноста на Таџ Махал, се наоѓаат два кенотафи во чест на Мумтаз Махал и Шах Јахан, изградени со мозаици и скапоцени камења наречени pietra dura. Но, прекрасните споменици се само за украс, бидејќи саркофазите се наоѓаат во друга многу потивка просторија.
Редовно ја реновираат фасадата
Со оглед на загадувањето во Индија, белата фасада на Таџ Махал со тек на време станува жолтеникаво-кафена. Поради тоа, споменикот си добива „ден за разубавување“ наречен multiani mitti, со што работници ја чистат фасада и ја обновуваат, па сјајот на градбата се враќа во првобитна состојба.
Ја менува бојата во текот на денот
Една од убавините на овој споменик е тоа што ја менува бојата во текот на денот. Од самрак до зори, сонцето го трансформира мавзолејот. Некогаш изгледа дека е сив или бледо-розов, бел, па дури и портокалов кога заоѓа сонцето. За време на полна месечина, се продаваат специјални карти за негова посета, бидејќи тогаш има посебен сјај.
Планиран бил и црн Таџ Махал
Шах Јахан сакал да изгради уште еден ист Таџ Махал, но во црна боја, која што ќе изгледа како да му е сенка на овој споменик, од спротивната страна на реката Јамуна. Таму сакал да биде погребан токму тој самиот. Сепак, оваа негова желба никогаш не се исполнила.