Копенхаген е место кое ќе задоволи сечиј вкус. Ако ја посетите населбата Вестербро ќе бидете во можност да видите проститутки, јавни куќи и стриптиз барови, а веднаш од спротивната страна луксузни хотели и ресторани. Но, со оглед на луксузноста, во тие локали воопшто не е евтино.
За просечен оброк, кој се состои од едно или две овошја, малку леб, путер, кајгана, јогурт заедно со два пијалаци може да платите и до 40 евра. Ако сепак одлучите да седнете и да се почувствувате луксузно, изберете ги Pixi или Taxa. Ако целите кон нешто подобро, тука се наоѓаат и италијанските ресторани Mother и Pate Pate, за кои мора да имате претходна резервација. Данците сакаат здрава, вегетаријанска исхрана, па ако и вие припаѓате на таа група може да седнете во Morgenstedet или Simple Raw.
Начинот на плаќање во Копенхаген е мошне интересен. Нарачувате и веднаш плаќате, па потоа келнерот ви го носи јадењето и пијалакот, без воопшто подоцна да чекате за плаќање.
Данците се мошне опуштен народ кој знае како да ужива во животот. Најчесто превозно средство е велосипедот. Цените на автобуските билети во еден правец е 3 евра, а кафето во малку подобар кафе бар изнесува 5 евра.
Она што не смеете да го пропуштите е замокот и старата кралска резиденција, ботаничката и зоолошка градина и бројните паркови низ целиот град.
Ако сакате да се опуштите целосно, упатете се кон квартот Кристианиа, каде што луѓето се шетаат како што сакаат и може слободно да пушат марихуана. Само овде не смеете да сликате, бидејќи фотографирањето е забрането.