Во Северна Грција се наоѓа живописното место Сани, кое веќе со години ги привлекува љубителите на јахти од целиот свет. Сместен е на 80км од Солун, на западното крајбрежје на Касандра, а многумина знаат да го наречат балканскиот Монте Карло во мало пакување.
Покрај престижните бродови, овде ќе најдете луксузни бутици, ресторани со ѕвездите на Мишелин, но и хотели како излезени од бајки. Она што ги импресионира посетителите е единствената марина за луксузни јахти која е позната како идеална точка за крстарење околу Халкидики.
Проширувањето и реновирањето на модерната и атрактивна „Sani Marina“ со површина од 32.000м2 и вода со длабочина од 3 метри, обезбедува 215 места за индивидуални јахти и бродови, кои се под надзор 24 часа. Исто така во центарот се наоѓа и голем плоштад околу кој има барови, ресторани, продавници на светски брендови, шеталиште, галерии, кино на отворено, пабови и дискотеки. Местото е исполнето со грчката традиција, но и медитеранска атмосфера.
Магичните плажи со бел песок му оддаваат посебна нота на местото, па посетителите често имаат чувство дека се наоѓаат негде низ Карибите, а не само на неколку часа од Македонија. Посебна приказна е музичкиот фестивал на отворено кој секоја година се организира на Сани Хил, покрај древната византиска кула. Околу градот се простира борова шума, а сообраќајот скоро и да го нема, поради што ова е единствено еколошко место.