По смртта на Принц, многумина сериозно започнуваат да мислат дека 2016-та е проколната година. Само 4 месеци од нејзиниот почеток, нема месец што не е одбележан со смрт на некоја позната личност.
Нумеролошки 2016-та е година на бројот 9 или поедноставно кажано година на завршетоците. Но, дали тоа е доволно објаснување за сè што се случува?
BBC направи мал преглед на темата и има неколку претпоставки зошто во последно време добиваме само тажни вести од светот на богатите и познатите.
Според првата сега едноставно им дошло време за умирање.
-Луѓето кои станаа познати во 1960-тите сега влегуваат во своите 70-ти и започнуваат да умираат. Освен тоа има повеќе познати луѓе од порано што имало. Во генерацијата на мојот татко и дедо, единствените познати луѓе биле оние од кино, немало телевизија, вели Ник Серпел, уредник во BBC.
Многу од оние кои сега умираат припаѓаат на таканаречената бејби бум генерација што е родена во периодот помеѓу 1946-1964, кога имаше голем раст на популацијата, а со тоа и поголеми шанси од родените да влезат во светот на шоу бизнисот.
Сега тие бебиња се на возраст од 52 до 70 години, период кога се поподложни на најразлични болести, а со тоа и на смрт.
Уште една причина поради која сме бомбардирани со вести за починати ѕвезди е во модерниот начин на комуницирање.
-Во последните 10 години социјалните медиуми играат голема улога во овој феномен, објаснува Серпел.
Неколку часа пред смртта на Принц, почина и поранешната борачка и порно актерка Чајна. Веста за нејзината смрт за кратко се прошири низ целиот свет благодарение на Twitter, што уште еднаш покажува дека социјалните мрежи го забрзуваат процесот на ширење на информациите.
Ова значи дека наскоро можеме да очекуваме уште смртни случаи од оваа генерација. Но, не се исклучени и лоши вести за несреќни случаи на луѓе кои воопшто не требале да умрат.