Денес е годишнина од бракот на Вилијам и Кејт. Двојката која се запозна на колеџ, денес ги прослави своите 5 години брак.
Кејтлин Мидлтон на свои 20 години се запознала со принцот Вилијам и тоа преку заеднички пријатели од колеџот Св. Ендрус во Шкотска. Постојано се дружеле на забавите, јаделе пица, но и играле заедно тенис. Подоцна Кејт организирала студентско модно шоу, каде што се појавила во проѕирен фустан, само по долна облека. Многумина се шегуваат дека токму тогаш Вилијам се вљубил во Кејт.
Подоцна, заедно беа видени на зимски одмор во Клостерс, каде што за прв пат се бакнале и оттогаш се неразделни.
Се слушаа разни гласини, за тоа дека не може Кејт со стилот на облекување да биде идната Леди Ди, но на сите им стана јасно дека еден ден ќе дојде тоа за време на доделувањето на дипломите. Токму тој ден, родителите на Кејт, Керол и Мајкл им се придружија на кралицата Елизабета и принцот Чарлс заедно со Кејт и Вилијам за да го прослават дипломирањето на нивните деца. Од тогаш сите очекуваа наскоро да заблеска голем дијамантски прстен на раката на Кејт.
На изненадување на јавноста, во април 2007 година, парот се раздели. Беа разделени неколку месеци и дури јавно прозбореа дека овој пат навистина е крај. Сепак, не можеа да поднесат да бидат разделени и се смирија. Две години откако повторно се вратија во врска, односно во ноември 2010 година, тие се свршија, а Кејт со огромно задоволство го покажа нејзиниот свршенички прстен.
Како плод на нивната љубов се родија двете деца, Џорџ и Шарлот. Сега веќе Кејт изгледа како вистинска принцеза, чиј изглед редовно го копираат младите Британки и скоро сите ја заборавија девојката во проѕирниот фустан.