Даниел Кајмакоски победи во хуманитарното шоу „Tvoje Lice Zvuci Poznato“ и наградата од 25 илјади евра реши да ја подари на самохрана мајка од Куманово. И додека претходните победници во шоуто се решија да ги дадат парите во хуманитарни институции, Даниел ја отфрли оваа пракса.
-Искрено немам доверба во институциите бидејќи знам дека парите кои обично им се даваат на нив не одат во рацете на оние што им се потребни, па затоа се решив да ги дадам на поединец. Да и помогнам на конкретна личност. Затоа сметам дека ова семејство е вистинското место каде што треба да за заврши помошта, вели тој.
Пејачот открива дека судбината на Јасмина Додевска, самохраната мајка од Куманово, чии деца боледуваат од полицистични бубрези и цироза на црн дроб, многу го потсетува на судбината на неговата мајка, која исто така била самохрана.
-Затоа решив наградата да ја дадам на тоа семејство. И мојата баба била самохрана и затоа мошне ме погоди и потресе кога видов дека оваа жена од Куманово сама се бори и се труди да се избори за здравјето на своите деца. Мислам дека донесов добра одлука да им ја дадам наградата на нив, додава Кајмакоски.
Неговата победа несомнено беше заслужена, но по некои коментари на социјалните мрежи постојат и такви кои се незадоволни со фактот дека не победил Србин.