Фондацијата на американскиот актер Џорџ Клуни има намера да донира 2,25 милиони долари за отворање седум училишта за 3.000 сириски деца бегалци во Либан, јавува „Гардијан“.
- Фондацијата не сака да се дозволи илјадници млади луѓе да останат „загубена генерација". Тие се жртви на географијата и состојбите, но тоа не значи дека нема надеж. Со оваа иницијатива ние имаме за цел -помош и обезбедување образование за сириските деца бегалци и од нив да произлезат идните лидери, коишто на нивната генерација очајно им требаат, соопштија актерот и неговата сопруга Амал Клуни.
Освен „Клуни Фондацијата за правда", во проектот учествуваат и Google и HP.
Од Фондот за деца при Обединетите Нации (УНИЦЕФ), кој што раководи со проектот, соопштија дека поддршката од семејството Клуни е „инвестирање во иднината на целиот регион". Либан веќе ги осознал добрите намери на ѕвездите од џет-сетот, додаваат оттаму.
Либанскиот министер за образование, Маруан Хамаде изјави дека неговата држава е благодарна на хуманиот гест.