Холивудските актерки Фелисити Хофман и Лори Логлин како и сопругот на Лори, Мосимо Џанули заедно со уште 50 други лица се обвинети за давање мито во скандал поврзан со упис на нивните деца на престижни колеџи.
Според информациите, кои се појавија во јавноста, Хофман платила 15 илјади долари, прикажани како донација, на личност која требала да ги смени резултатите од тестирањето на нејзината ќерка.
Очајната домаќинка е обвинета за правење заговор за измама, по што и е одземен пасошот и има забрана за патување. Актерката е пуштена од затвор откако плати кауција од 250 илјади долари.
Логлин допрва треба да им се предаде на властите, откако вечера се врати од Канада. И таа е обвинета за измама бидејќи заедно со сопругот Мосимо наводно платиле 500 илјади долари за да ги запишат ќерките на Универзитетот на Јужна Калифорнија.
Полицијата веќе го уапси нејзиниот сопруг на кој му беше одредена кауција од 1 милион долари, по што тој беше принуден да го даде семејниот дом како гаранција дека нема да избега.
Мито шемата беше откриена од ФБИ, кое дозна дека група родители платиле сума од 6 милиони долари за нивните деца да бидат примени во определени колеџи. Притоа некои од децата воопшто не знаеле дека нивните родители презеле таков чекор.
На чело на целата измама стои Вилијам Сингер, кој се изјаснил како виновен по сите обвиненија. Се претпоставува дека неговата криминалната организација собрала околу 25 милиони долари мито од родители кои сакале по секоја цена да ги запишат своите деца на престижните универзитети од типот на Јеил, Џорџтаун, Стенфорд, Универзитетот на Јужна Калифорнија и слично.