Актерката Моли Фицџералд, која имаше мала улога во хит-филмот „Капетан Америка: Првиот одмаздник“, е уапсена под обвинение за убиство на својата мајка во Канзас, САД.
Патриша Фицџералд (68) била пронајдена мртва во нејзиниот дом на 20 декември, а нејзината ќерка беше уапсена завчера. Таа е обвинета за убиство од втор степен. Одредената кауција е половина милион долари.
Засега не се познати мотивот и точните околности на убиството.
– Ние сме во шок, но околностите не се важни. Важно е тоа дека ја изгубив сестра ми, изјави братот на жртвата – Гери Хунзикер за „Канзас Сити стар“.
Фицџералд е актерка, режисер и продуцент. Во 2011-та година се појави во филмот за суперхеројот Капетан Америка, каде што му беше и асистентка на режисерот Џо Џонсон. Последни филмови каде што таа глумеше се „Trouble Is My Business“ (2018), како и „Girl of My Dreams“ (2017) и „King of Wishful Thinking“, којшто е во постпродукција.