Најдобриот светски тенисер, Новак Ѓоковиќ се венча на островот Свети Стефан во Црна Гора со својата девојка Јелена Ристиќ со која е во врска осум години. „Свадбата на векот“ се одржа под мермерна купола, специјално направена за овој пар.
Целата церемонија се одвивала многу брзо. Свеченоста почнала во 18 часот, а завршила по 30 минути. Во матичното, Јелена го земала презимето на Ѓоковиќ и со тоа стана младата г-ѓа Ѓоковиќ. Сепак венчавањето пред Бога ќе се одржи во сабота, откако ќе заврши постот, а нивен кум ќе биде фудбалерот Сервет Невен Марковиќ, долгогодишен другар на Ноле.
Целата свадба се одржува во строга тајност. Персоналот кој работи потпишал договор во кој ветува дека нема да споделува никакви информации во јавноста и дека нема да користи мобилни телефони или фотоапарати. Исто така, владата на Црна Гора му обезбеди на Ноле службена полиција од секторот за обезбедување на имоти и лица, кои ќе бидат во служба до црковното венчање.
Ноле потпишал договор со магазинот „Hello“ кој ќе го има ексклузивното право да присуствува на свадбата, а деталите и официјалните фотографии ќе бидат објавени на 14 јули.
Будва деновиве е преплавена со многу познати личности од спортот. Дел од нив беа и Виктор Троицки со неговата девојка, Софија Милошевиќ.
Меѓу гостите беа и колегите на Новак, Јанко Типсаревиќ и Ненад Зимољиќ, кои дојдоа со своите понежни половини.
На свадбата беа присутни и тренерите на Ноле, заслужени за неговото враќање на место број 1 на ATP листата, Борис Бекер и Маријан Вајда.
На свадбата можеше да се види и кондициониот тренер на Ѓоковиќ, Гебард Фил Грич заедно со својата сопруга.
Еден од највеселите на свадбата беше чичкото на Новак, Горан Ѓоковиќ.
Новак Ѓоковиќ успеа да ги почасти своите фанови со една фотографија од венчањето, која ја објави на неговиот профил на Facebook.
Ѓоковиќ го пречекале на Свети Стефан со една поговорка од Његош: Имало за што да се роди! И навистина е така! Со среќа на младенците!