Ако BAFTA наградите се своевиден предвесник на Оскарите, тогаш мошне веројатно е дека La La Land ќе ја освои и златната статуетка за најдобар филм.
Мјузиклот освои дури 5 BAFTA награди, вклучувајќи ја онаа за најдобар филм и за најдобра актерка, која отиде во рацете на Ема Стоун.
-Мислам дека е посебно тоа што можеме да се собереме оваа вечер благодарение на BAFTA и да го одбележиме позитивниот дар на креативноста и на тоа како истата може да ги надмине границите и да им помогне на луѓето да се чувствуваат помалку осамено, рече Стоун во својот говор.
Таа победи во категорија каде беа номинирани Мерил Стрип, Ејми Адамс, Емили Блант и Натали Портман, а воедно и е номинирана за Оскар.
Дев Пател ја освои наградата за најдобра машка споредна улога, додека помеѓу жените оваа награда и припадна на Вајола Дејвис. Кејси Афлек пак се закити со BAFTA награда за најдобра машка улога во Manchester by the Sea.
-Просторијата изгледа мошне поинаку од тука, се пошегува актерот кој очигледно беше видно возбуден од наградата. Тој изјави дека зборувал со Мерил Стрип околу нејзиниот говор на Златните глобуси и дека е во ред да се зборува за политички теми. За него ваквите говори значат дека, сепак има надеж во светот.
На годинешните BAFTA награди политиката остана во втор план, а нешто по што ќе бидат запаметени несомнено е гламурозното појавување на Кејт Мидлтон и нејзиниот сопруг. Принцот Вилијам дури и зема учество во церемонијата, доделувајќи една од наградите.