Гледачите ќе имаат можност да бидат дел од страшниот свет на писателот на бестселери Стивен Кинг во новата серија со десет продолженија „Кесл Рок“ (Castle Rock) која ќе има премиера на 2. август на HBO GO кога ќе станат достапни првите четири епизоди.
Потоа, по една нова епизода ќе доаѓа секој четврток во понудата. Премиерата на HBO 3 каналот ќе биде на 26. август.
Комбинирајќи ги митолошките мотиви и интимните приказни на ликовите од најпопуларните романи на Стивен Кинг, серијата претставува сага за темнината и светлината која се одигрува на неколку квадратни километри во шума во американската сојузна држава Мејн.
Измисленото гратче Кесл Рок има значајно место во литературниот опус на Кинг: дејствието во романите „Куџо“ (Cujo), „Темната половина“ (The Dark Half), „Тоа“ (IT) и „Неопходни работи“ (Needful Things), како и во новелата „Тело“ (The Body) и бројните кратки приказни како што се „Рита Хејворт и бегството од Шошенк“ (Rita Hayworth and The Shawshank Redemption) е или сместено во Кесл Рок или на некој начин е поврзано со тоа гратче.
„Кесл Рок“ е уникатна психолошка хорор серија и прво вакво истражување на световите на Кинг која се базира на култните приказни на Кинг кои ги обожуваат читателите низ целиот свет.
Во главните улоги ќе ги гледаме: Андре Холанд („Месечина“, „Селма“, „42“), Мелани Лински („Заедништво“, „Во воздухот“), Бил Скарсгард („Toа“, „Атомска блондинка“), Џејн Леви („Чистилиште во предградието“, „Бесрамници“) и Сиси Спејсек („Кери“, „Ќерката на рударот“). Во улогата на актер гостин ќе го гледаме Скот Глен („Преостанати“).
Серијата е во продукција на Џ. Џ. Абрамс и неговата продуцентска куќа „Bad Robot Productions“ во соработка со „Warner Bros. Television“. Сем Шо и Дастин Томасон го развија ТВ проектот и се извршни продуценти заедно со Џ. Џ. Абрамс, Стивен Кинг, Бен Стивенсон, Марк Лаферти и Лиз Глоцер.