Специјална награда за најдобра режија „Златна роза“ освои македонскиот филм „Мејкинг Оф“ на режисерот Кузман Кузмановски на 6-тото издание на меѓународниот филмски фестивал „Славјанска приказна“ кој се одржува во Софија.
Филмот беше прикажан на 8-ми септември пред бројна публика во рамки на фестивалот, кој трае од 7 до 10 септември 2018 година во Софија, Бугарија.
-Оваа награда доаѓа по само неколку дена од премиерата на филмот. Тоа е потврда на правилото дека кога нешто се работи од срце, тоа ќе биде забележано и вреднувано. И се заблагодарувам на целата екипа која се вложи максимално професионално во овој филм, вели режисерот Кузмановски.
Во моментов филмот е на репертоар на кино Синеплекс.
Станува збор за интригантна приказна за една девојка со тешка судбина и тројца млади луѓе кои се решаваат заедно да тргнат на патешествие - да снимат филм.
Кинематографер на филмот е Марко Петрушевски, а актерската екипа ја сочинуваат Александар Микиќ, Александра Павлова, Владо Дојчиновски, Ванчо Петрушевски, Хана Менсон, Дубравка Киселички , Катина Иванова, Љупчо Бојковски, Лазе Манасков ,Пирунка Киселички, Мартин Минговски.