Во режија на наградуваната режисерка на документарци Сузан Лејси, филмот „Џејн Фонда во пет чина“ (Jane Fonda In Five Acts) е интимен осврт на уникатното животно патување на Фонда. Премиерата на HBO GO е на 25. септември, додека на HBO каналот ќе се емитува на 4. октомври во 21:45 часот.
Ова е приказна за девојка од соседството, сексапилна мачка, активист, тајкун во фитнес. Оскаровката Џејн Фонда живее живот кој е проткаен со контроверзност, трагедија и преобразба, а сето тоа го прави пред очите на јавноста.
Документарецот е заснован на интервјуата водени 21 час со Фонда, која зборува отворено и искрено за својот живот и своите грешки. Ја истражува болката поради самоубиството на нејзината мајка, емотивната недостапност на нејзиниот татко, пореметувањето со исхраната со кое се борела 30 години, а зборува и за трите брака со познати, но сосема различни мажи. Сузан Лејси ги користела и интервјуата направени со семејството и пријателите на Фонда, ретките снимки од приватните архиви, како и оние од денешно време каде е прикажан нејзиниот брз начин на живот иако има 80 години и кој таа го нарекува „почеток на својот последен чин“.
Во филмот се користени и интервјуа со Роберт Редфорд, Лили Томлин, продуцентот Пола Вајнстин и поранешните мажи Том Хејден и Тед Тарнер. Првите четири чина на животот на Фонда се именувани по четирите мажи со кои споделувала лични и професионални амбиции, а и многу влијаеле врз нејзините одлуки. Петтиот чин е именуван по самата Фонда, која конечно се соочува со своите демони, одново се поврзува со семејството и продолжува успешна кариера како актерка и активистка, целосно под нејзини услови.
Џејн Фонда е активна и денес, ангажирана е во политиката и во светот на креативноста и ни покажува дека нема ограничувања во животот ако тој е исполнет со одлучност, чесност и напорна работа.
Докуметарниот филм го режирала Сузан Лејси, а директор на фотографија е Сем Пејнтер. Лејси, Еми Пилдс и Џесика Левин се продуцентки, додека за музиката беше задолжен Пол Кантелон.