IDIVIDI: Незаборавна и 5 години по смртта

Изминатиот викенд на Lifetime каналот во САД беше прикажан The Brittany Murphy Story, биографскиот филм за актерката Британи Марфи, која почина во 2009-та година од пневмонија и анемија на возраст од само 32 години.

Аманда Фулер беше одбрана да ја портретира трагично починатата актерка во биографскиот филм посветен на нејзиниот живот и кариера, но дел од нејзините фанови, а и таткото на Британи оторено го искажаа незадоволството од The Brittany Murphy Story.

Таткото на Британи јавно преку својот Twitter профил отворено ја нападна Фулер, актерката која ја глуми неговата ќерка, а и самиот филм нарекувајќи го „ефтин“.

Своето филмско деби Британи го имаше во 1993-та година кога се појави во Family Prayers покрај Ен Арчер, за нејзината слава да пристигне по само 2 години со улогата во Clueless. Изненаден класик на 90-те години Clueless до ден денешен е еден од најценетите филмови во нејзината кариера кој и помогна да отиде во стратосферата.

Во 1999-та година Британи беше дел од два одлични филма. Црната комедија Drop Dead Gorgeous покрај тогаш непознатата Ејми Адамс, и ѕвездите на 90-те Кристен Данст и Дениз Ричардс, а исто така и во биографската драма Girl Interrupted покрај Анџелина Џоли и Винона Рајдер.

Новиот милениум и донесе соработка со Мајкл Даглас во трилерот Don’t Say A Word, но и со Дру Баримур, во уште една биографска драма Riding In Car With Boys во кој глумеше млада мајка.

Во 2002-ра година пристигна 8 Mile филмот на Куртис Хенсон со Еминем во главната улога, а во наредните неколку години таа беше препознавана по романтичните комедии. Just Married, Uptown Girls, Little Black Book беа само дел од филлмовите кои Британи ги сними за само неколку години. По појавувањето во Sin City, нејзината популарност и понудата на добри улоги се намали, за да оваа 2014-та постхумно биде објавен последниот нејзин филм Something Wicked.