Првата ревија на добри филмови ќе се оддржи од 18. до 24. септември ексклузивно во киното Cineplexx Skopje City Mall!
Во текот на овие седум ревијални денови, ќе бидат прикажани вкупно четиринаесет филмови. Меѓу најактрактивните наслови кои посетителите ќе имаат можност да ги погледнат се веќе најавените „Господин Тарнер“ (режија на Мајк Ли) – добитник на наградата за најдобар актер на овогодинешниот филмски фестивал во Кан и „Том на фарма“ (режија на Ксавиер Долан), добитник на наградата FIPRESCI на филмскиот фестивал во Венеција.
Филмоманија ни ги носи и најновите филмови на култните и познати режисери меѓу кои секако ги издвојуваме Лукас Модисон – „Ние сме најдоброто“, добитник на Гран При наградата на филмскиот фестивал во Токио; Корнелиу Порумбиу со „Кога ќе се спушти ноќ над Букурешт“, прикажан во официјалната конкуренција на филмските фестивали во Њујорк, Локарно и Торонто и Оливие Асајас „Облаците над Силс Марија“, прикажан во официјална конкуренција на филмскиот фестивал во Кан, со оскаровката Жулиет Бинош и ѕвездата на „Сага на самракот“ Кристен Стјуард во главните улоги.
Од филмовите кои заслужуваат посебно внимание, ги издвојуваме „Рација 2“, новиот филм на режисерот Герет Еванс, прикажан на филмските фестивали во Санденс и Карлови Вари; „Григрис“, последниот филм на Махамат Салех Харун, прикажан во официјална конкуренција на фестивалот во Кан; „Макондо“ на режисерката Судабех Мортазаи, прикажан на овогодинешниот филмски фестивал во Берлин.
Ниту американската продукција нема да остане незабележана на оваа ревија. Во рамки на Филмоманија, публиката ќе има можност да ја погледне независната драма „Костурски близнаци“ на режисерот Крег Џонсон, добитник на наградата за најдобро сценарио на филмскиот фестивал Санденс и филмот „Вратена младост“ (Арон Катц и Марта Стефанс), прикажан на фестивалите во Санденс, Локарно и Лос Анџелес.
Проекциите ќе се одржуваат секој ден, од 18 септември до 24 септември, во термините 16:00ч, 18:30ч и 21:00ч. Повеќе информации за филмовите и програмата можете да најдете на страницата на Cineplexx www.cineplexx.mk
Билетите се пуштени во продажба. Цена на билет е 150 ден по проекција.
Филмови кои ќе се прикажат на Филмоманија:
Господин Тарнер / Mr. Turner – Mike Leigh
Григрис / Grigris – Mahamat-Saleh Haroun
Кога ќе се спушти ноќ над Букурешт / Când se lasa seara peste Bucuresti sau metabolism – Corneliu Porumboiu
Костурски близнаци / Skeleton Twins – Craig Johnson
Макондо / Macondo – Sudabeh Mortezai
Ние сме најдоброто / Vi är bäst – Lukas Moodysson
Облаците над Силс Марија / Clouds of Sils Maria – Olivier Assayas
Вратена младост / Land Ho! – Aaron Katz i Martha Stephens
Рација 2 / The Raid 2: Berandal – Gareth Evans
По ред на исчезнување / In Order of Disappearance – Hans Petter Moland
Срце на лав / Leijonasydän – Dome Karukoski
Том на фарма / Tom a la Ferme – Xavier Dolan
Црвена армија / Red Army – Gabe Polsky
Ритaмот на лудилото / Whiplash - Damien Chazelle