Колин Фарел е новиот „вистински детектив“. Ирскиот актер ќе ја толкува главната улога во втората сезона од успешната антологиска серија True Detective, беше потврдено денес од американските медиуми.
Фарел ќе биде едната половина од актерското дуо во втората сезона од True Detective, додека за улогата на неговиот партнер се борат актерите Винс Вон и Тејлор Кич. Според досегашните пишувања, дејствието на втората сезона ќе биде сместено во 3 градови во Калифорнија, а сижето ќе наликува на микс од култните филмови Chinatown и Zodiac.
За женските улоги во втората сезона од True Detective, Рејчел Мекадамс и Елизабет Мос се главните фаворитки на Пизолато, но се’уште нема потврдено која од актерките е одбрана да биде ѕвезда на втората сезона.
Првата сезона која беше режирана од младиот Кери Фукунага, беше критички успех, а имаше одлична гледаност од страна на ТВ публиката. Главните улоги во антологиската серија ги толкуваа Вуди Харлисон и Метју Меконахи, кој пак освои Оскар при самиот крај на прикажувањето на самата серија.