Раде Шербеџија и неговата филмска екипа деновиве на улиците во Велес го снимаат долгочекуваниот филмски проект „Ослободување на Скопје“.
Снимањето кое што започна вчера привлече големо внимание кај велешани кои љубопитно излегоа на улиците во живо да погледнат како изгледа сето тоа. За потребите на филмот на сетот беа поставени окупаторски знамиња, камиони и олдтајмери, а актерите беа облечени во костими кои соодветствуваат на временскиот период кој што го обработува филмот.
Сценариото за „Ослободување на Скопје“ е напишано уште пред 7 години, а е базирано врз истоимената претстава според драмата на Душан Јовановиќ.
- Цело време додека живеев во Америка размислував како да направам филм од таа прекрасна претстава, која имаше толкав голем успех во светот. Тоа е неверојатна приказна за Македонија, за тој посебен менталитет, музика, за посебни карактери, драматична приказна за војната и една невозможна љубов, човечка привлечност, меѓу Македонка и германски офицер. Тоа е она што го препознаваат луѓето, изјави Раде Шербеџија на неодамнешната прес-конференција во Скопје.
Снимањето во Велес и околината ќе трае околу една недела, а потоа ќе се снима во Битола. Доколку сè оди по планот снимањето на филмот треба да заврши на 19-ти декември.
Фото:Кристина Костовска
Видео: Анита Стојанова