Филмското студио „Сони Пикчерс“ се откажа од прикажување на филмот „Интервју“, што беше планирано за 25 декември, откако најголемите кино сали низ САД, одлучија да не го прикажуваат ова филмско остварување, поради безбедносни причини.
Во „Интервју“ се говори за исмислен заговор за убиство на севернокорејскиот лидер Ким Џонг-ун, Двајца американски новинари заминуваат во Северна Кореја на интервју со Ким, но тајно се врбувани од ЦИА за да извршат атентат врз него.
Хакери веќе извршија кибер напади врз датотеката на „Сони Пикчерс“, но преку интернет испратија и сериозни закани предупредувајќи ги потенцијалните гледачи да не одат во кино салите да го гледаат филмот.
Претходно во последен момент беше откажана и њујоршката премиера на овој филм.
Компанијата „Сони Пикчерс“ изрази жалење поради ваквата разврска, нагласувајќи дека и натаму стои зад својата последна продукција, како и зад правото за слободно изразување, но го разбира решението на кино салите и киноприкажувачите.
Хакерска група, која себе се нарекува „Чувари на мирот“ вчера се огласи со предупредување во кое потсетува на настаните од 11 септември 2001 година, порачувајќи дека „светот ќе биде исполнет со страв“, доколку филмот се прикажува, а луѓето одат да го гледаат.
Американското ФБИ покрена истрага околу хакерските напади и притоа откри дека тие се поврзани со Северна Кореја, но американската администрација порача дека не располага со никаква валидна разузнавачка информација за постоење заговор за напади врз кино сали.