Леонардо ди Каприо повторно се здружи со уште еден одличен режисер, на уште еден биографски филм, и на уште еден потенцијален оскаровски проект, а со него ни се објасни и изгледот кој тој го имаше во јавноста (запуштен и несреден), бидејќи таков е и во самата продукција на филмот.
The Revenant е името на најновиот проект на Леонардо ди Каприо, на кој како режисер и сценарист се потпишува Алехандро Гонзалес Ињаирту, режисерот кој моментално е еден од 5-те номинирани за овогодинешните награди Оскар.
Лео во The Revenant ќе го глуми Хју Глас, ловец на животни, специјализиран за дерење на истите и продавање на крзното. Тој бил нападнат и речиси осакатен од дива мечка. Членовите на неговиот тим на ловокрадци по нападот го ограбиле и оставиле да умре, но тој некако преживува. Откако се опоравува започнува одмазничка мисија низ дивиот запад кон тие што го предале.
Покрај Леонардо во останатите улоги ќе имаме можност да ги видиме и Том Харди, Домнал Глисон, Вил Поултер и Кристофер Џонер.
Премиерата на The Revenant во САД се очекува на 25-ти декември оваа година, на време за да се квалификува за оскаровската трка следната година, а ова се првите фотографии од најновиот филм на Лео.