„Медена ноќ“ најновото дело на македонскиот режисер Иво Трајков овој петок ќе ја има честа да го отвори најновото издание на Скопскиот филмски фестивал.
Приказната во „Медена ноќ“ е инспирирана од новелата „Уво“ на Јан Прохаска, еден од најдобрите сценаристи во историјата на чешката кинематографија, а во неа...
„Скопје, рани 90-ти години од минатиот век, прослава на национален празник на новоформираната независна држава Република Македонија, а во исто време и десетгодишнина од бракот на Никола, заменик-министер, и неговата сопруга Ана.
Во текот на линеарното дејство кое се одвива во една ноќ во која кулминира брачната криза на главните протагонисти, низ флеш-бек секвенци од прославата, ја следиме втората наративна линија на оваа приказна каде што се отсликуваат професионалниот живот и искушенијата на Никола, инволвиран во еден политички скандал во неговото министерство во врска со приватизација на едно државно претпријатие.
Во текот на бурните расправии помеѓу Никола и Ана од причина што тој заборавил на нивната годишнина од бракот, на виделина излегуваат сите нивни проблеми, фрустрации и тајни. Тензијата на оваа брачна драма се интензивира и со стравот и паранојата на Никола кој е во потрага по својот извештај за приватизација на претпријатието поради што се уапсени министерот и неколку негови соработници.
Во оваа долга и исцрпувачка ноќ тие не се сами. Во нивниот дом се инсталирани направи за прислушување…“
Главните улоги во „Медена ноќ“ ги толкуваат Никола Ристановски и Верица Недевска, а филмот беше снимен во Македонско-Чешко-Словенска ко-продукција.
Погледнете го првиот трејлер за „Медена ноќ“.