Одлична вест за сите фанови на Мајкл Фасбендер. Првиот тизер трејлер за биографскиот филм на режисерот Дени Бојл посветен на животот и кариерата на Стив Џобс конечно е објавен.
Во улогата на Стив Џобс, ко-основачот на Apple фановите имаат можност да го видат Мајкл Фасбендер (кој моментално добива одлични критики во Кан за неговата улога во Macbeth), а од 1-минутниот трејлер може да се погледне самиот Фасбендер во препознатливата црна ролка која ја носеше Џобс.
Биографскиот филм на Дени Бојл, ќе се фокусира на животот и карерата на самиот Џобс од неговите почетоци, се до 1998-ма година со презентацијата на Imac компјутерот, тогашната последна иновација. Покрај Фасбендер, во останатите улоги ќе се појават и Сет Роген (како Стив Вознијак), Кејт Винслет (како Џоана Хофман), Џеф Даниелс (како Џон Скали) и Кетрин Ватерстон (како Крисиан Бренан, девојката на Стив).
Сценарист на Steve Jobs e Арон Соркин, оскаровецот кој претходно ги напиша The Social Network, Charlie Wilson's War, Moneyball, а од последните ТВ проекти ја креираше серијата The Newsroom. Последниот филмски проект на режисерот Дени Бојл пак беше Trance од 2013-та година со Џејмс Мекавој во главната улога.
Премиерата на Steve Jobs се очекува на 9-ти октомври, а веќе се смета за еден од потенцијалните фаворити во сезоната на награди.
Додека ја очекуваме премиерата, погледнете го првиот тизер за Steve Jobs.