Од 15-ти до 18-ти октомври ќе се одржи 34-тото издание на Skopje Jazz Festival. Овој традиционален фестивал се одржува секоја година во главниот град, на кој настапуваат светски познати имиња од џез музиката.
Овој пат, фестивалот нема да се одржува во универзалната сала, каде до сега се одржуваше, па настапите се распоредени во Македонската опера и балет и Сити хол центарот.
- Со овогодинешната програма ќе се обидеме да го зачуваме високиот и етички музички перформанс, со оглед на позитивните реакции на луѓето од Европа и светот. Исто така ќе се потрудиме да ги задоволиме вкусовите не само на организаторите, туку и на публиката, која во голем број го следи фестивалот долго време. Фестивалот е отворен за секоја добра музика со вокални и музички импровизации, најави директорот на фестивалот, Белопета.
Покрај беспрекорните музички имиња, како што се James Blood Ulmer, Melt Yourself Down и Gregory Porter, ќе настапат и многу џез изведувачи кои обожаваат да импровизираат со својата музика. Целата програма можете да ја погледнете на официјалната веб-страна на Skopje Jazz Festival.
Интересно е што, освен музичкиот дел, ќе има и изложба на џез фотографии на Петра Цвелбар, која ќе се отвори на 15 октомври во 18:30 часот во фоајето на МОБ. Изложбата е наречена „Sweet addiction“ и на истата ќе бидат претставени фотографии од џез изведувачи.