Калиопи Букле доби втора шанса да пее на Евровизија откако МРТ вчера објави дека ја избрал за наш претставник на Изборот на песна за Евровизија што годинава ќе се одржи во Стокхолм, Шведска.
- Сигурни сме дека соработката на МРТ, со добро познатата комбинација, на поп дивата Калиопи и композиторот Ромео Грил кој што и овој пат ќе биде автор на македонската евровизиска композиција, ќе резултира со модерен, атрактивен евровизиски производ, со афирмативен национален карактер, велат од телевизијата.
Калиопи за прв пат нè преставуваше на Евровизија во 2012-тата година кога на големата евровизиска сцена се претстави со песната “Црно и бело” и се пласираше на 13-то место.
Дали овој пат ќе и тргне од рака да оствари позначителен пласман и што е поважно дали ќе ја има вистинската песна, останува допрва да видиме.
Во меѓувреме многумина се прашуваат дали втората шанса која и беше дадена на Калиопи во суштина требаше да ја добие некој друг пејач. Како Букле, така и Каролина Гочева два пати се најде на евровизиската сцена, но и покрај одличниот глас и богатата музичка карира не успеа да ја пронајде магичната формула што ќе нè доведе до врвот.
Кое е вашето мислење?