Ден по големиот концерт на Жан Мишел Жар средуваме впечатоци за она што вчера вечер му се случи на Скопје.
А, му се случи многу...Да почнеме со тоа што Жан Мишел има 68 години, а неговата енергија е како на момче што допрва зачекорува на електро сцената.
Тој не живее на стара слава. Тој не се задоволува со просечност. Тој го подига нивото, што впрочем јасно се гледа од перфекцијата на неговиот звук.
Визуелните ефекти се приказна за себе. Тие само го надополнуваат она што Жар го работи со години.
Французинот е уметник par excellence и од него не може да се очекува помалку од „лудило“ перформанс. Годините поминати на сцена и истенченото чувство за ритам го потврдуваат неговиот култен статус.
Само што домашната публика изгледа немаше поим колку добар може да биде и како изгледа кога музичар од негов калибар ќе застане пред ласерски клавијатури и совршено ќе ги спои звукот и сликата со едноставно движење на раката. Еден збор е доволен...Нереално!
Дали сме импресионирани? И повеќе од тоа! Ретки се оние кои вчера завршиле на концерт, а денес не отвориле YouTube за да преслушаат дел од песните на Жар, чисто за да си ги средат впечатоците од сензационалното шоу.
Тука спаѓаат и оние ликови кои залутаа на концертот само затоа што слушнале дека „некој си Жан Мишел“ настапува во Скопје и дека главна фора е да бидеш дел од случувањето. Ако ништо друго, сега и тие се навлечени на него...
Н. Вуковиќ