Во третата, а воедно и најбогата концертна вечер од OФФест 2018-та, најпрвин се загреавме во ритамот на фамозната „пициката“ и Officina Zoe кои успешно ни ја доловија традиционалната музика од Саленто, носејќи не на уникатно музичко патување од возбудливи и моќни битови.
Веднаш по нив сцената им припадна на Ifriqiyya Electrique, кои приредија вистинско транс уживање од африкански звук низ кој се проткаени електро звуци и остри гитарски линии. Како јаготка на шлагот, вечерта во МКЦ ја затвори една од најдобрите изведувачки од Турција, Гаје Су Акјол. Нејзината мешавина на стилови, ја прави опојно мистична за публиката, а нејзиниот глас и убедлив перформанс несомнено ја потврдуваат љубовта и посветеноста кон музиката.
По завршувањето на концертите предвидени за МКЦ, забавата продолжи во клубот Епицентар каде настапи познатиот белгиски ди џеј Мукамбо.
Во прилог погледнете дел од третата фестивалска вечер доловена низ објективот на Александар Зарапчиев.